«Кітапханадағы жасыл күн» Көңілді идеялар күні

17 мамыр күні Шахан кентіндегі №8 кітапхана-филиалының қызметкерлері «Кітапханадағы жасыл күн» атты көңілді идеялар күнін өткізді. Іс-шараға кітапхананың жас оқырмандары қатысты. Күні бойы балалар экологиялық бағыттағы викториналарға, ойындар мен байқауларға белсене қатысып, ерекше қызығушылық танытты. Балалардың назарын «Жасыл кітаптар» атты ерекше кітап көрмесі аударды. Көрмеде жасыл мұқабалы танымдық басылымдар, ертегілер, өлеңдер мен шытырман оқиғалы кітаптар ұсынылды. «Кітап бетіндегі аңдар мен құстар» атты әдебиеттер көрмесіндегі жарқын әрі қызықты кітаптар да балаларға көтеріңкі көңіл күй сыйлады. Жас қатысушылар «Жасыл жұмбақтарды» қызығушылықпен шешіп, «Құстар білгірлері», «Жасыл патшалық», «Жануарлар әлемінде» атты байқауларда өз білімдерін көрсетті. «Мен білемін», «Тірі және өлі табиғат» сияқты танымдық ойындар мен экологиялық тапсырмалар балалардың ерекше қызығушылығын тудырды. Оқу залында барлық ниет білдірушілер үшін «Көңілді бақа» атты оригами жасау бойынша шеберлік сабағы өткізілді. Онда балалар өз қиялдары мен шығармашылық қабілеттерін көрсете алды. Сонымен қатар балалар «Әлемді жасыл түске боя» акциясына үлкен ықыласпен қатысып, іс-шараға жарқын көңіл күй мен мейірімді атмосфера сыйлады. «Кітапханадағы жасыл күн» көңілді, қызықты әрі танымды өтті. Бұл шара балаларға табиғатты сүю мен қорғаудың қаншалықты маңызды екенін еске салды.