«Нейро-зертхана: Ертегілер фабрикасы»
Қаладағы Оқушылар сарайы, Е. Бөкетов атындағы ЖББМ және Ш. Уәлиханов атындағы мектеп-гимназия жанындағы лагерь тәрбиеленушілері үшін №13 балалар кітапхана-филиалының қызметкерлері классикалық әдебиет пен заманауи технологияларды ұштастырған «Нейро-зертхана: Ертегілер фабрикасы» атты зияткерлік-танымдық ойын бағдарламасын ұйымдастырды.
Іс-шара барысында жас қатысушылар «промпт-инженерлердің» рөлін сомдап, жасанды интеллектке шатасып кеткен ертегі алгоритмдерін қалпына келтіруге көмектесті. Балалар кейіпкерлер туралы файлдардың құпиясын ашып, нейрожелідегі «ақауларды» анықтап, жүйені виртуалды спамнан тазарту бойынша түрлі тапсырмаларды сәтті орындады.
Командалар қатысқан шығармашылық баттл ерекше қызығушылық тудырды. Қатысушылар блогерге айналған Бауырсақ пен дрон арқылы жеткізу қызметін пайдаланатын Қызыл телпек туралы тәрбиелік мәні бар кибер-ертегілер құрастырып, өз қиялдары мен шығармашылық қабілеттерін көрсетті.
Іс-шара барысында балалар заманауи технологиялардың мүмкіндіктерімен танысып қана қоймай, шығармашылық ойлау қабілеттерін дамытты. Бағдарлама соңында қатысушылар ең озық компьютерлік технологиялардың өзі адам қиялын, достықты және кітап оқуға деген сүйіспеншілікті алмастыра алмайтынына көз жеткізді.
